ÁLVARO CUETO
Álvaro Cueto Cueto nació en Villaviciosa el 18 de xunetu de 1991. Entamó a tocar la gaita nel añu 1999 na Escuela de Musica Tradicional de la Banda Gaites Villaviciosa, teniendo como profesor a Miguel Alonso, amás de recibir clases de solfeo y piano na Escuela de Música Municipal de Villaviciosa.
En 2003 entró a formar parte de la Banda Gaites Villaviciosa, baxo la direición de Martin Poladura, cola que nos años 2005 y 2006 algama la Liga Galega de Bandas de Gaitas y nel añu 2007 llogra el segundu puestu na mesma, n’esos años recibe a mayores clases de perfeccionamientu de José Manuel Tejedor y Xuacu Amieva.
Nel añu 2009 pasa a ser componente de la Banda Gaites Ribeseya, de la cual faise cargu de la dirección de la sección de gaites nel postreru añu. En 2010, tamién entama a trabayar cola fábrica escocesa Pipe Dreams nel diseñu y preba de payones pa gaita asturiana. Nel añu 2012 algama otra vegada la Liga Galega de Bandas de Gaitas cola BGRibeseya.
Ente l’añu 2012 y 2017 collabora cola Banda Gaites LaKadarma, nel espectáculo Synexthesia de la Banda Gaites Xacara y la LittleBand del Conservatorio Profesional de Musica de Gijón. Amás, dende l’añu 2016 ye gaiteru y flautista del grupu de Post-Rock Melandru col que tien editaos dos discos: el primeru, homónimu, nel añu 2018, col que participen nel Festival Interceltique de Lorient, y nel añu 2024 asoleyen II.
Nel añu 2018 entama el proyectu NÓS xunto al cineasta Pablo Casanueva y la Banda Gaites Ribeseya, un conciertu/ documental que s’estrena nel añu 2019 col que algamen 5 nominaciones a los Premios de la Música Asturiana.
Dende l’añu 2021 faise cargu de la direición musical de la Banda Gaites Ribeseya, y ye profesor de percusión na Escuela de Musica Municipal del Conceyu de Ribeseya coles especialidaes de; tambor, caxa y bombu.
En 2024 entama a dirixir la Banda Gaites Camin de Fierro, de los conceyos de Proaza, Teverga y Santo Adriano, amás de volver como componente a la Banda Gaites Villaviciosa - El Gaitero.
N’estos últimos años retoma la so trayectoria como gaiteru solista, destacando los primeros puestos en: el Memorial José Huerta de Villaviciosa nel añu 2024, el Gelu Cuervo de Ribeseya 2024 y 2026 ,el Concurso de pareyes de gaita y tambor Villa de Candas xunto a Hernán Iglesias, y el Memorial Manuel y Antón de Cogollu nel añu 2026. Tamién continúa cola su formación como gaiteru solista y na pedagoxia de la gaita de la mano de Ricardo Soberado y manipulación y fabricación de cañas (payueles y payones) con Balbino Menéndez, na Escuela de Música Tradicional “Manolo Quirós” d’Uvieu.
N'esti añu 2026, faise cargu de la direición musical de la Banda Gaites Villaviciosa - El Gaitero, y tamién, de la formación de gaiteros na Escuela de Música Tradicional de la BGV.
DIREUTOR MUSICAL
EDU LLOSA
DIREUTOR DE PERCUSIÓN
Edu Llosa entamó la so trayectoria musical nel ámbitu de la música tradicional asturiana na Banda Gaites Villaviciosa - El Gaitero, onde se formó como gaiteru y percusionista. A lo llargo de los años, esta formación permitió-y ampliar la so esperiencia musical y explorar otros estilos, desenvolviendo tamién la so faceta como baterista y percusionista en distintos proyectos y agrupaciones.
Continuó la so formación nel Conservatorio Profesional de Música y Danza de Gijón y nel CONSMUPA, completando los sos estudios con cursos y masterclasses, amás de participar en conciertos nacionales ya internacionales y numberoses grabaciones d'estudiu.
Amás de la gaita y la percusión, desenvuelve la so actividá musical como guitarrista, compositor y productor, participando en diversos proyectos. La so trayectoria combina la interpretación musical, la creación y la producción, xunto col so compromisu cola enseñanza y la tresmisión de la música tradicional.
Como percusionista, forma parte de la Banda Sinfónica de Gijón, cola que participa en conciertos y actuaciones tanto nel ámbitu local como nacional. Tamién desenvuelve la so faceta como percusionista nos grupos Alienda y Abéu, collaborando en actuaciones y grabaciones d'estudiu.
Nel ámbitu de la construcción y el caltenimientu d'instrumentos, entamó apocayá un taller de luthería especializada en preseos de percusión, dedicándose a la so creación y arreglu.
Na actualidá, ye direutor de percusión y profesor na Banda Gaites Villaviciosa - El Gaitero, onde dirixe la seición de percusión ya imparte clases de caxa y tambor na Escuela de Música Tradicional de la banda, contribuyendo a la formación de nueves xeneraciones de músicos y a la continuidá de la tradición musical asturiana.